ការរាលដាលនៃជំងឺ បាននាំអោយអាជ្ញាធរក្នុងប្រទេសមួយចំនួន ជម្រុញគូស្វាម៉ីភរិយា កុំអោយមានការពពោះ ក្នុងពេលដែល មជ្ឈមណ្ឌលសហរដ្ឋអាមេរិក សម្រាប់ការត្រួតមើលជំងឺ បានព្រមានស្ត្រីមានផ្ទៃពោះ កុំធ្វើដំណើរទៅប្រទេស ២២ ដែលកំពុងតែរងគ្រោះ។ Zika ជាវីរូស ដែលកំណត់អត្តសញ្ញាណដំបូងបង្អស់នៅលើស្វា នៅទ្វីបអាហ្វ្រិក ក្នុងឆ្នាំ ១៩៤៧ ដាក់ឈ្មោះតាមព្រៃមួយនៅប្រទេស អ៊ូហ្គង់ដា ដែលគេរកឃើញសត្វស្វាមានជំងឺនេះលើកដំបូងនៅទីនោះ។ ជាច្រើនឆ្នាំមក វីរូសបានកើតមានលើមនុស្ស នៅ អ៊ូហ្គង់ដា និងតង់ហ្សានី។
ដូចជាជំងឺគ្រុនឈាមដែរ Zika ត្រូវបានចម្លងដោយមូសមួយប្រភេទ ដែលគេរកឃើញនៅតំបន់ត្រូពិក និងតំបន់ក្រោមត្រូពិក គឺមូស Aedes albopictus ឬហៅថាមូសខ្លា។ បើទោះជាជំងឺបង្ហាញពីការគ្រុនបន្តិចបន្តួច ធ្វើអោយអ្នកមានជំងឺមិនចាប់អារម្មណ៍ក៏ដោយ តែផលប៉ះពាល់វាធំណាស់ ដោយសារតែវាធ្វើអោយមានបញ្ហាខួរក្បាល និងការមានកំណើតមិនគ្រប់សិរីរាង្គ សម្រាប់ទារកដែលមានមាតាកំពុងតែមានជំងឺនេះ។
ករណីជំងឺនេះ ក៏មាននៅប្រេស៊ីល និងកោះប៉ូលីនេហ្ស៊ី របស់បារាំងដែរ។ មិនទាន់មានថ្នាំបង្កា Zika នៅឡើយទេ ហើយក៏មិនមានវិធីព្យាបាលដែរ អ្នកជំងឺបានត្រឹមតែទទួលថ្នាំបំបាត់ការឈឺចាប់ និងថ្នាំទប់ទល់នឹងរោគសញ្ញាតែប៉ុណ្ណោះ៕
ប្រភពពី knv-info
