រកឃើញថ្នាំដែលអាចកម្ចាត់មេរោគអេដស៍ហើយ

ផ្ដល់សិទ្ធិដោយ មង្គលការ

ក្រុមការងារនៃសាកវិទ្យាល័យវេជ្ជសាស្ត្រ UC Davis (សហរដ្ឋអាមេរិក) បានប្រកាសការរកឃើញថ្មីមួយ ពីការព្យបាលអ្នកជំងឺដែលមានផ្ទុកមេរោគអេដស៍។ ការស្រាវជ្រាវដែលទើបនឹងចេញផ្សាយនេះ បានថ្លែងថា មេរោគអេដស៍ អាចរំងាប់នៅក្នុងខ្លួនមនុស្សបានតាមរយៈការប្រើថ្នាំសម្រាប់ព្យាបាលជំងឺមហារីក។

បច្ចុប្បន្ននេះការព្យាបាលដោយប្រើថ្នាំប្រឆាំងនឹងមេរោគអេដស៍ (ដើម្បីពន្យាអាយុជីវិត) មានប្រសិទ្ធិភាពបំផុត។ ប៉ុន្តែវិធីនេះគ្រាន់តែអាចបំផ្លាញ់មេរោគអេដស៍ ដែលមានជំរកនៅក្នុងសសៃឈាមប៉ុណ្ណោះ តែមិនអាចកម្ចាត់ “អាងស្តុក មេរោគអេដស៍” ដែលរស់នៅអាថ៌កំបាំងនៅក្នុងរាងកាយរបស់អ្នកជំងឺបានទេ។

អំណាចនៃ “អាងស្កុតមេរោគ អេដស៍” ត្រូវបានបញ្ជាក់តាមរយៈករណីទារកម្នាក់ឈ្មោះ “Mississippi”។ ក្មេងស្រីរូបនេះបានឆ្លងមេរោគអេដស៍ ពីម្តាយនៅតាំងពីកំណើត ហើយត្រូវបានព្យាបាលដោយថ្នាំប្រឆាំងនឹងមេរោគអេដស៍ តាំងពីប៉ុន្មានម៉ោងដំបូងនៃការចាប់កំណើតរបស់នាងមកម្ល៉ះ (ការព្យាបាលនេះមានរយៈពេល ១៨ខែ)។

បន្ទាប់ពីរយៈពេល ៥ខែក្រោយមក គ្រូពេទ្យមានការភ្ញាក់ផ្អើលយ៉ាងខ្លាំង ពេលដែលនាងមិនមានរោគសញ្ញាណាមួយនៃការឆ្លងរោគ ក្នុងការធ្វើតេស្ត។ ប៉ុន្តែនៅពេលដែលក្មេងនេះមានអាយុ ៤ឆ្នាំ គ្រូពេទ្យបានរកឃើញថាមានផ្ទុកមេរោគអេដស៍នៅក្នុងឈាមវិញ។

គ្រូពេទ្យបានកំណត់ពីការថយចុះប្រព័ន្ធភាពស៊ាំរបស់ក្មេងម្នាក់នេះ ហើយវត្តមានរបស់មេរោគអេដស៍ ចាប់ផ្តើមសកម្មនៅក្នុងរាងកាយ។

យុទ្ធសាស្ត្រ “កម្ចាត់” ត្រូវបានគេចាត់ទុកថាជាគន្លឹះដ៏សំខាន់ក្នុងការព្យាបាល មេរោគអេដស៍។ វាគឺជាការប្រើថ្នាំដើម្បីធ្វើឲ្យមេរោគ អេដស៍ ដែលលាក់ជ្រៅនៅក្នុងរាងកាយមានសកម្មភាពឡើង ហើយថ្នាំដទៃទៀតនឹងកម្ចាត់វាបាន នៅពេលពួកវាចូលទៅក្នុងឈាម។

ថ្នាំដែលអ្នកស្រាវជ្រាវនៅសាកលវិទ្យាល័យវេជ្ជសាស្ត្រ UC Davis បានប្រើប្រាស់គឺ PEP005 នេះជាសមាសភាគដ៏សំខាន់នៅក្នុងការព្យាបាលជំងឺមហារីកស្បែក។ ពួកគេបានធ្វើការសាកល្បងថ្នាំនេះទៅលើកោសិកា នៅក្នុងមន្ទីរពិសោធន៍ និងលើផ្នែកមួយនៃកោសិកាភាពស៊ាំបានយកពីអ្នកជំងឺ ១៣នាក់ ដែលមានផ្ទុកមេរោគ អេដស៍។

លោកបណ្ឌិត Satya Dandekarr ជាសមាជិកនៃក្រុមស្រាវជ្រាវនេះបាននិយាយថា «យើងមានក្តីរំភើបណាស់ដែលអាចស្វែងរកឃើញថ្នាំដែលល្អបំផុតសម្រាប់បំផ្លាញមេរោគ អេដស៍»។

ទោះបីជាយ៉ាងណាក៏ដោយ ថ្នាំទាំងនេះមិនត្រូវបានគេសាកល្បងនៅលើអ្នកជំងឺដែលមានផ្ទុកមេរោគអេដស៍នៅឡើយទេ តែអ្នកស្រាវជ្រាវសង្ឈឹមថា វានឹងត្រូវបានឆាប់ដាក់បញ្ចូលឲ្យប្រើប្រាស់ឆាប់ៗនេះ។

លោកសាស្ត្រាចារ្យ Sharon Lewin នៅសាកលវិទ្យាល័យ Melbourne បានមានប្រសាសន៍ថា លទ្ធផលនេះគឺជាការពិតមួយ និងត្រូវបានសម្គាល់ជាជំហានដ៏សំខាន់ក្នុងការស្វែងរកវិធានការធ្វើឲ្យមេរោគលេចឡើង និងកម្ចាត់វាចោលតែម្តង៕

អ្វីៗដែលបានផ្សាយថ្មីៗនេះ